O tenente alcalde do Concello de Lugo, Rubén Arroxo, anunciou este mércores a aprobación dos pregos que rexerán a colocación das casetas do polbo no San Froilán 2021. "As actuais medidas sanitarias no sector da hostalería permítennos volver contar de novo cos casetas do polbo, adaptando os prezos basee das licitacións á situación sanitaria do momento", explicou Arroxo.
Pola súa banda, os prezos dos produtos que ofrecen as casetas manteranse igual que nos últimos anos, coa ración de 250 gramos de polbo a 12 euros, a ración de pan e de 200 gramos de cachelos a 1,50 euros e a botella de viño a 6 euros.
O concelleiro nacionalista sinalou que "o prezo de saída das casetas será o mesmo que no ano 2015, e os caldeiros manterán o prezo de saída do ano 2016", que serán modificados con tres tramos segundo os aforamentos permitidos na hostalería. Así, cada unha das empresas interesadas presentará prezos para a licitación das casetas para unha situación de aforamento do 100%, para un tramo inferior ao 100% pero superior ao 50% de ocupación e para o tramo entre o 30% e o 50% de cabida.
No caso de limitarse o aforamento dos establecementos de hostalería nunha porcentaxe inferior ao 30%, poderase optar por non exercer a actividade ou continuar coa categoría inferior.
