Un novo proxecto do Concello que será financiado con fondos europeos do programa Edusi pretende rehabilitar unha casa de propiedade municipal no barrio do Carme para convertelo en aloxamento de artistas a modo de espazo 'coliving'.
A iniciativa foi presentada este martes en rolda de prensa pola alcaldesa Lara Méndez e o concelleiro de desenvolvemento local, Mauricio Repetto, quen explicaron que este proxecto tamén busca potenciar a posta en marcha de empresas culturais.
Lara Méndez comentou que a intención do Concello é impulsar e pór en valor o patrimonio de Lugo, pero desde diferentes perspectivas, mediante a creatividade multidisciplinar e o contacto co Camiño Primitivo.
Para iso, os artistas que participen no 'coliving', convivirán e traballarán nun inmoble, xunto ao cal pasa ademais o Camiño, onde recibirán formación por parte de artistas consagrados e expertos en xestión empresarial.
A casa disporá dun espazo exterior con programación cultural e as obras dos artistas participantes serán vendidas no local de 'coworking' municipal situado na Tinería, dado que "nace como un proxecto sostible".
Pola súa banda, Mauricio Repetto explicou que o goberno local está a desenvolver as bases para becar a 16 artistas cada ano, catro por cuadrimestre, e engadiu que a intención é que, tras o orzamento inicial que se habilitará para pór en marcha a iniciativa, poida logo autofinanciarse coa venda das obras.
