O bispo de Lugo, Afonso Carrasco Rouco, asegurou este mércores que a Diocese non ten intención de cobrar "nunca por entrar ao corazón da Catedral" da capital lucense, un templo do século XII que foi declarado Patrimonio da Humanidade xunto co Camiño Primitivo.
"Nós non imos cobrar nunca por entrar ao corazón da Catedral, onde está o máis característico, centrado ao redor do Santísimo Sacramento", dixo o bispo de Lugo en resposta a preguntas dos xornalistas durante unha visita ás últimas obras de restauración executadas por Cultura no templo.
"Non imos cobrar nin para entrar a rezar, nin para ver o altar maior, nin para todo o que é a nave central", precisou.
En todo caso, recoñeceu que a Diocese terá que "buscar algún xeito" para conseguir recursos que lle permitan "financiar as obras de mantemento".
"Se atopásemos algún xeito, nunca sería en todo caso, cobrar por entrar no corpo principal da catedral, que estará sempre libre e aberto. É máis, nós desexamos que as persoas poidan entrar. Rezar, se xa comprenden o que teñen ante os seus ollos ou, se non, descubrilo", engadiu.