A directora executiva de Leite Río, Carmen
Segundo Carmen Lence, “o grupo xamais refuga nin desperdicia alimentos. O noso obxectivo, e unha das razóns de ser da industria alimentaria, é a de poder axudar a construír unha sociedade máis inclusiva e solidaria”.
“No noso caso, iso tradúcese contribuíndo a favorecer unha alimentación segura, saudable e nutritiva para todos, sexa cal for a súa situación”, engadiu.
Dese modo, “todos os alimentos aptos para o consumo que non se distribúan ou que formen parte dos stocks dos lanzamentos de novidades, dóanse a causa xustas”, explicou José Ramos, xerente da Planta Leyma de Leite Río.
O Grupo Leite Río –que comercializa as marcas Río e Leyma-, confirmou que doará este mes 1.440 litros de leite ao Banco de Alimentos da Coruña, como vén “facendo de xeito habitual e ininterrompido desde hai dous anos”.
Neste sentido, o grupo alimentario lucense “continúa e reforza a tradición familiar de colaborar con entidades sociais que traballan directamente para colectivos de persoas con especial vulnerabilidade”, explica a propia empresa nun comunicado, algo que “Leite Río vén facendo regularmente desde fai 20 anos”.
Igualmente, “de xeito extraordinario”, recorda, o grupo implícase “noutras iniciativas solidarias que supoñen un incremento da súa doazón mensual, como a recente entrega ao Banco de Alimentos da cantidade equivalente, en leite, á cedida polos abonados do Leite Río Breogán dos abonos da pasada tempada, o que supuxo unha entrega de 90.000 litros de leite para familias desfavorecidas”.
O ano pasado, coincidindo coa Campaña de Nadal, o grupo doou cinco pallets cunhas 9.300 unidades de batidos de chocolate.