O alcalde de Becerreá, deputado provincial non adscrito e presidente de Suplusa, Manuel Martínez, presentou este xoves á cabeza de lista do seu partido, Galicia Sempre, á Alcaldía de Lugo, a profesora de filosofía Carmen González -exerce no Lucus Agusti-, unha lucense de 58 anos que fai a súa primeira incursión no mundo da política.
En declaracións aos medios de comunicación, Martínez aclarou que se buscaron para esa candidatura, que será presentada ao completo a próxima semana, "persoas independentes, que non dependesen de ninguén, que tivesen unha profesión".
Ese é o perfil, aclarou, da "lista completa de Galicia Sempre", porque está formada por persoas que “non son ninis, teñen unha profesión, ten un soldo e iso dálles independencia”.
Carmen González: "Manolo solicitoumo; imos tirar para adiante"
Segundo Martínez, a persoa que estaba detrás deste proxecto, "deu longas e desapareceu", pero os que quedaron á fronte desta nova opción política tiraron "de orgullo", seguiron adiante "con esta aventura" e agora espera que "esta proposta sexa ben recibida polos cidadáns".
De feito, recordou que "outras persoas que estaban na lista, por presións ou por coaccións, decidiron abandonala", o que lle dá máis mérito a Carmen González, "que aguantou".
Pola súa banda, Carmen González precisou que ata agora nunca participara en política", pero sempre foi "moi crítica coa administración dos recursos de todos" e coa "crispación" que ese está "a vivir" no panorama político, tanto no ámbito local como nacional. "Manolo solicitoumo. Eu estou moi a gusto con el e imos tirar para adiante", concluíu.
