O histórico barrio de O Carme iniciou unha segunda vida que nada ten que ver coa decadencia e o abandono que sufriu durante a maior parte da súa historia, entre a indiferenza das autoridades e a fuxida dos antigos veciños que, nun tempo afastado, habitaban as decenas de casas hoxe medio derrubadas que poboan a zona.
Na tarde de onte comezou esta nova etapa nun acto presidido pola alcaldesa Lara Méndez e con Guido Álvarez de guía turístico, no que se presentou á cidadanía as accións de limpeza e recuperación dos camiños e muros realizados en pedra seca, así como a instalación de varandas, paneis informativos e as balizas colocadas no chan que hoxe iluminan a zona.
HYDE PARK. Tamén trataron de que coas súas palabras a cidadanía asumise a importancia do barrio referíndose a el como "o Hyde Park de Lugo" ou "a única fiestra verde que queda entra a muralla e o río".
Seguidamente, os asistentes puideron visualizar unha exposición creada para a ocasión que incluía información de interese sobre as distintas melloras e, para terminar, foron invitados a unha merenda saudable que estivo acompañada pola música en directo da cantautora lucense, Sara Nebra, que mestura a música popular galega con electrónica nun formato innovador.
As principais accións foron explicadas durante o paseo-visita que puxo en valor o feito de que se pretenda humanizar este barrio polo discorre o Camiño Primitivo e a Vía Romana XIX, que comeza na cidade portuguesa de Braga e ten a súa orixe na época de Augusto, primeiro emperador romano. Devanditas medidas suporán que os veciños, peregrinos e usuarios poidan gozar da zona cunha maior seguridade e accesibilidade.
A ocasión foi aproveitada pola alcaldesa para anunciar que o Concello vai continuar levando a cabo acciones que leven á transformación do Carme. As actuacións, que aínda están a ser perfiladas en distintos proxectos, incluirán a peonalización da zona e a definitiva unión do centro histórico coa contorna do río Miño. Porque a "cidade debe crecer, pero debe facelo de xeito sostible", asegurou Méndez.
