A axuda que prestan as entidades que combaten a pobreza e a exclusión social fíxose máis necesaria que nunca durante a urxencia sanitaria causada pola Covid-19. Un exemplo dese labor altruísta é Cáritas de Lugo, que presta os seus servizos na diocese máis extensa de España, pois abarca tres provincias e conta con 1.139 parroquias. Durante o confinamento axudou a máis de 2.000 persoas, o que supuxo un incremento do 40% con respecto ao mesmo período do ano pasado, segundo asegurou onte a súa secretaria xeral, Mónica Yáñez. Ao longo do estado de alarma tamén asesorou telefonicamente a máis de 4.000 persoas.
Uns 1400 usuarios vístense ao longo do ano no roupeiro que ten Cáritas Diocesana na Avenida das Américas
Ese duro "traballo" que presta "ás persoas que máis o necesitan" foi destacado luns pola conselleira de Política Social, Fabiola García, que, xunto ao director xeral de Inclusión Social, Arturo Parrado, visitou as dependencias que ten Cáritas na Avenida das Américas da capital lucense. Accédese a elas con cita previa e tras un control de temperatura. É preciso desinfectar as mans con xel hidroalcohólico e levar posta máscara. Nesas dependencias atópase o roupeiro Cáritas Diocesana conta con outros dous en Monforte e Sarria. Ao longo do ano viste a máis de 1.400 usuarios.
Nútrese das doazóns de particulares. Actualmente está ben servido. Os lucenses aproveitaron o confinamento para cambiar o armario. "Cando volvemos abrir as portas foi tremendo, había bolsas e bolsas de roupa", recordaba o luns o seu responsable, que apuntaba que debido á situación sanitaria as pezas que reciben téñenas en corentena durante sete días "é como unha tenda. Os usuarios collen as pezas en función das necesidades que teñan os membros da familia", explicaba durante a visita de Fabiola García o seu encargado, que destacaba que os miles de artigos de que dispoñen están en tan bo estado que os podería pór calquera persoa". A roupa que non reúne os requisitos é recollida por unha empresa coruñesa de reciclaxe e inserción laboral.
As pezas están repartidas en andeis por tipo (camisas, pantalóns, camisetas...), sexo e idade (de 0 a 3 anos, de 3 a 6, de 7 a 14 anos e adultos).
O calzado de cabaleiro e a roupa de cama son os artigos dos que ás veces non anda tan sobrado o roupeiro de Cáritas de Lugo.
Esta entidade de inclusión social está á espera de que se poidan iniciar as obras de reforma no antigo palacio de Velarde, na Praza de Santo Domingo, onde se agruparán estas dependencias da Avenida dás Américas e as oficinas da Rúa da Cruz.
Un programa con 44 anos de vida
Algúns participantes convértense despois en monitores de tempo libre que botan unha man nos campamentos urbanos que organiza. Este verán a situación sanitaria obriga a Cáritas a reducir o número de usuarios, 60 o de nenos e 26 o de adolescentes.
Cáritas tamén leva a cabo acciones para que os desfavorecidos poidan atopar un posto de traballo. Así ofrece información e orientación laboral, formación e acompañamento na procura de emprego.
Actualmente imparte un curso de operario de limpeza. Segundo apuntaba o responsable do programa de emprego, trátase de adecuar os perfís dos demandantes ás actividades con máis saída laboral (cociña, atención domiciliaria, condutor de carretilla elevadora...), xunto aos cursos de competencias crave.
