LUGO. Un lucense que formaba parte dunha rede de tráfico de droga asentada en Xixón foi condenado a tres anos de prisión como autor dun delito contra a saúde pública. O home, de 35 anos, estaba integrado nunha banda organizada de 17 narcos, todos eles condenados a penas de entre tres e seis anos de cárcere.
A investigación policial que permitiu deter a estas 17 persoas iniciouse a principios de 2013, cando as forzas e corpos de seguridade detectaron un aumento do consumo de speed, anfetaminas e drogas de deseño na cidade de Xixón.
As pescudas levadas a cabo polos axentes permitiron identificar a existencia dun grupo «perfectamente organizado e xerarquizado» que se dedicaba ao tráfico de estupefacientes.
A rede conseguía as sustancias en Galicia, fundamentalmente en Vilagarcía de Arousa, e máis excepcionalmente nalgunhas zonas do sur do país. Posteriormente, preparábanas en Xixón e distribuíanas en varias rexións próximas, como Cantabria e Castela e León.
Os membros do grupo distribuíanse claramente as tarefas, creando diferentes equipos. Uns encargábanse do aspecto financeiro e recadatorio, outros da loxística e almacenaxe, outros da manipulación e corte da droga, e outros da súa distribución e venda polo miúdo. O lucense condenado formaba parte dos distribuidores.
Tras varios meses de investigación, a Policía Nacional detivo aos 17 narcos e rexistrou os seus domicilios, nos que atoparon drogas de todo tipo e en distintas porcentaxes de riqueza. Entre as sustancias incautadas había MDMA, cocaína, anfetaminas, ketamina, lidocaína e resina de cannabis, así como gatos hidráulicos para prensar cocaína e outros útiles para manipular as distintas clases de droga que pretendían distribuír.
Os membros da organización tamén tiñan no seu poder diversas armas prohibidas, incluídas pistolas, puñales e armas extensibles.
O lucense, condenado a tres anos, era comercial en Asturias. Lle requisaron 12 móbiles, anfetaminas e unha defensa eléctrica
COMERCIAL. En concreto, na vivenda do lucense -que traballaba como comercial e tiña o seu domicilio fixado na provincia de Xixón-, os axentes atoparon 15 gramos de anfetaminas, valorados en 634 euros; 500 euros en metálico gardados nunha caixa forte; doce teléfonos móbiles; 28 cartóns de telefonía; unha báscula de precisión; unha listaxe de sustancias utilizadas habitualmente para adulterar cocaína e unha defensa eléctrica.
Un dos xefes tiña ao seu nome dúas vivendas, nas que os investigadores requisaron diferentes tipos de estupefacientes. As drogas intervidas alcanzarían no mercado ilícito un prezo superior a 1,2 millóns de euros. Este home, natural de Xixón, foi condenado a un total de cinco anos de cárcere por un delito contra a saúde pública e pertenza a banda armada, e terá que abonar unha multa de 1.233.762 euros.
O home que os investigadores cualificaron como «principal membro do grupo» delituoso foi condenado a un total de seis anos e medio de prisión como autor dos delitos de tráfico de droga, pertenza a banda armada, e tenencia ilícita de armas prohibidas.
