Lunes. 19.11.2018 |
El tiempo
Lunes. 19.11.2018
El tiempo

Carballo será presentado o día 14 como candidato do PP

O PP celebrou unha xunta directiva provincial para dar inicio ao curso político. XESÚS Ponche
O PP celebrou unha xunta directiva provincial para dar inicio ao curso político. XESÚS Ponche

Elena Candia preside unha xunta provincial na que se apostou por traballar para poder gobernar máis concellos e a Deputación

LUGO. O PP ten previsto presentar o vindeiro venres 14 de setembro a Ramón Carballo como candidato á alcaldía de Lugo nas eleccións municipais do maio de 2019 nun acto no que está prevista a asistencia do presidente do partido en Galicia, Alberto Núñez Feijóo.

Os candidatos populares das sete grandes cidades galegas serán presentados nas próximas semanas en diversos actos, aínda que o de Lugo podería ser un dos primeiros en celebrarse.

A dirección galega e nacional do PP xa deron o visto e prace á candidatura de Carballo coa que o PP se marcará o obxectivo de recuperar a alcaldía da capital lucense, que está en mans dos socialistas desde 1999.

Precisamente, ese foi un dos obxectivos que se marcaron os populares na xunta provincial do partido que se celebrou onte e onde a súa presidenta provincial, Elena Candia, apostou por traballar duro durante os próximos meses para tratar de conseguir os apoios necesarios para gobernar máis concellos na provincia e dirixir tamén a Deputación.

«Quédannos oito meses por diante de moito traballo, un tempo non que nos deixaremos a pel para que en maio de 2019 o compromiso que temos coa provincia se traduza nun bo resultado nas urnas», comentou a presidenta do PP de Lugo durante a reunión.

Candia tamén aproveitou para criticar a xestión dos gobernos do PSOE, que dixo que «non son útiles», e engadiu que na provincia de Lugo os socialistas non teñen proxecto político e forman un partido «absorvido e abducido polo enfrontamento interno. Vémolo a diario na Deputación, onde ou único que conseguiron coas súas liortas foi desprestixiar esta institución», indicou.

Carballo será presentado o día 14 como candidato do PP
Comentarios