O candidato á Alcaldía do Partido Popular, Ramón Carballo, asegurou que quere "coñecer a letra pequena do teatrillo do pacto entre PSdeG e BNG", aínda que opina que "o final da función" será "decepcionante para Lugo", porque "priman máis os intereses partidistas que os intereses dos cidadáns".
De feito, cualificou como "predicible a posta en escena do pacto de perdedores para evitar que en Lugo goberne a lista máis votada".
Ademais, Carballo recoñeceu que teme que nos próximos catro anos Lugo sexa o escenario "dun goberno bicéfalo, de dúas caras", no que cada un dos socios "vaia por libre, pensando máis en porse cambadelas e en dinamitar as accións do seu socio, que en mirar polos intereses dos cidadáns".
Por iso, os populares piden "responsabilidade e altura de miras ao PSOE e ao BNG para solucionar os verdadeiros problemas dos lucenses", dado que "Lugo necesita un goberno forte e non dous equipos que vaian por libre".