O candidato do PP á Alcaldía de Lugo, Ramón Carballo, quixo destacar o resultado electoral do seu partido, porque foi a forza máis votada e conseguiu dez dos vinte e cinco concelleiros da corporación, pero tamén asume que, seguramente, un pacto entre o BNG e o PSdeG apartarao do goberno municipal, polo que xa promete “unha oposición dura, pero construtiva”.
En declaracións a Efe, Carballo asegurou que intentará desde a oposición facer aquilo para o que se comprometeu cos electores, basicamente “pór Lugo a andar” e intentar sacar á cidade “da parálise no que sumiu a cidade” a “falta de xestión do goberno socialista”.
“Hai proxectos urbanísticos, de mobilidade ou medio ambiente” que hai que “pór a andar”, dixo Carballo, do mesmo xeito que renovar os “contratos caducados” que lastran o funcionamento do concello, polo que os populares serán “duros” na oposición, pero sempre “nun sentido positivo”.
“Non entendo outra forma de facer oposición”, dixo Carballo, “criticaremos o que teñamos que criticar e apoiaremos o que teñamos que apoiar”, dixo o candidato do PP, en función dos intereses de Lugo.
De feito, confesou que “durante a campaña”, á hora de expor os programas de goberno, atopou “moitas coincidencias” con outros partidos, incluso co PSdeG, pero tamén precisou que “o problema” do goberno socialista foi que “non houbo ningunha xestión” en catro anos, porque “venderon titulares e fume, pero non executaron ningún proxecto”.
“O problema do PSOE é que ten as ideas plasmadas no seu programa, véndeas, pero logo non as executa”, engadiu, cando “á política vénse traballar, non a saír na foto”.
