O portavoz do PP, Ramón Carballo, asegurou este mércores que o seu grupo municipal baralla a opción de dividir en dous parciais unha das dúas dedicacións exclusivas que lles asigna o goberno local.
Os populares criticaron que a pesar de pasar de nove a dez concelleiros tras os últimos comicios váianse a quedar agora cunha dedicación exclusiva menos. Aínda así, Carballo confirmou que non van votar en contra no pleno de organización despois de que si fose aceptada a súa proposta de manter os tres postos de persoal de confianza cos que contaban ata agora.
Carballo tampouco quixo confirmar que edís terán dedicación ao Concello, aínda que todo parece indicar que o portavoz adxunto, Antonio Ameijide, e o concelleiro Manuel López, que ata agora contaban con dedicación exclusiva, sigan mantendo o soldo do Concello e, en todo caso, podería ser López o que teña que compartir a dedicación con algún compañeiro no caso de que se decida dividila.
De todos os xeitos, a decisión última podería depender de que concelleiro popular de Lugo é designado como deputado provincial pola circunscrición lucense e de se a persoa elixida acaba tendo ou non dedicación exclusiva do ente provincial, aínda que o pacto entre socialistas e nacionalistas podería recortar asignacións ao PP.
