Centenares de cans desbordan a Protectora, que aínda espera as obras prometidas en febreiro

A Deputación e o Concello de Lugo anunciaron o pasado mes de febreiro a aprobación da reforma integral da Protectora de Animais de Lugo cun orzamento de 270.000 euros. Con todo, as obras aínda non empezaron, cando xa "deberían estar practicamente terminadas", asegura Alberto Losada, tesoureiro da Protectora. Este atraso débese, segundo a Deputación, a que a licenza de obra está aínda á espera de ser tramitada e aprobada por parte do Concello.

Desde a Protectora cren que estas obras serán de gran axuda, pero que non solucionarán por completo o problema da falta de espazo que sofren os máis de 200 cans que viven neste refuxio, xa que se construirá un pequeno quirófano, unha nova entrada e zona de "corentena", se mejorá tamén o sistema de evacuación de residuos, reformaranse caniles, pero non se engadirán suficientes caniles novos como para resolver o problema da masificación.

En cada canil hai unha media de 3-4 cans, pero nalgúns pode chegar a haber 6, e apenas teñen espazo para correr.

Uns 400 cans dependen da Protectora de Animais de Lugo e 200 viven nos seus intalaciones de Santa María de Muxa

As instalacións están masificadas e os sete traballadores que ten a Protectora actualmente non dan abasto. "Hai cans que pasan semanas encerrados sen saír nin tan sequera media hora a pasear", asegura Ana Barga, que é voluntaria na protectora. ela cre que as institucións deberían contratar "polo menos a 4 persoas máis para que os cans poidan ser atendidos adecuadamente". A axuda dos 15 voluntarios que acoden regularmente a pasear cans alixeira levemente a carga de traballo dos traballadores, pero "non é suficiente", asegura o tesoureiro da Protectora.

FINANCIACIÓN A Protectora mantense grazas a subvencións públicas da Deputación e o Concello, pero son fundamentais as doazóns e as cotas dos socios. "Só coas subvencións non chegariamos a final de ano, xa que só en penso gastamos anualmente uns 30.000 euros", di Alberto Losada.

Ademais dos 200 cans que viven na protectora á espera de ser adoptados, a organización encárgase da manutención doutros 200 cans máis que están en casas de acollida; é dicir, estes cans viven temporalmente cunha familia, pero os gastos de alimentación e vacinación seguen sendo para a Protectora.

A Protectora de Lugo conta cun servizo de lacería: "Temos dúas persoas que acoden a recoller cans abandonados ou perdidos as 24 horas do día", afirma o tesoureiro da organización. Actualmente, esta Protectora ten convenios aprobados con oito concellos da provincia de Lugo e exponse non asinar ningún máis, xa que consideran practicamente inviable poder acoller a máis coas instalacións e os recursos, tanto humanos como económicos, dos que dispoñen.

¿Como se pode colaborar coa protectora?