O deficitario mantemento dalgunhas instalacións municipais deriva ás veces en problemas maiores, como filtracións de auga. Sucedeu recentemente no polideportivo do Palomar, onde parte da pista se levantou, e no pavillón Daniel Cordido, onde algunha competición se celebrou entre charcos, pero os problemas poderían chegar en breve a outros edificios visto o estado que presentan algúns dos seus condutos. Os canlóns do polideportivo de Frigsa, na zona onde está a pista de tenis de mesa e as pistas exteriores de tenis, están cheos de pelotas. Algunhas vense limpas, polo que parecen recentes, pero outras xa están negras, polo que cabe supor que levan tempo aí. Xunto a elas acumúlanse follas de árbores e ata botellas de refrescos.
A vexetación tamén se acumula nos canlóns das cubertas do campo de fútbol López Gorgoso, na Avenida Infanta Elena. Están cheos de follas, moitas delas xa podrecidas. Nesa mesma zona, a imaxe doutro edificio municipal reflexa falta de atención. Nun dos baixantes da nave do parque móbil municipal vese como crece un chopo.
[Casa da Muller. EP]
Non é esta a única instalación reconvertida en viveiro. En canlóns e baixantes da Casa da Muller -tamén situada no recinto de Frigsa- asoman varias árbores, o que indica que as sementes levan depositadas aí o suficiente tempo como para que xerminaran e crecesen.
Os condutos dos edificios situados no parque de Frigsa necesitan un especial mantemento porque debido á abundancia de árbores vai parar a eles moita materia orgánica, que acaba atascándoos. En concreto a Casa da Muller e o polideportivo López Gorgoso están rodeados de árbores, polo que se enchen de folla cando esta empeza a caer. Nalgunha época, os canlóns da Casa da Muller limpábanse dúas veces ao ano.
Noutras instalacións, as filtracións débense a problemas máis difíciles de corrixir. é o caso do pavillón Daniel Cordido. Os canlóns de chapa son vellos e están moi deteriorados pola corrosión, polo que a auga cae no falso teito dos vestiarios e nalgunha ocasión tamén chega á pista deportiva. O problema é que para cambialos hai que levantar os ferros da cuberta, polo que é unha obra de certo custo. Tamén se necesitan cambiar os ferros translúcidos do colexio de Paradai, para o que o Concello chegou a pedir orzamento hai un par de anos.
O Pavillón de Deportes é outra instalación que espera desde hai anos unha solución á auga que mete o vento entre as dúas cubertas de fibrocemento que ten o edificio.
Hai problemas en instalacións antigas e noutras que non o son tanto. No MIHL hai pingueiras desde o primeiro día. O problema de solucionalas é que, como a maior parte do edificio está baixo terra, hai que perforar para facer a reparación.
[Campo de fútbol López Gorgoso. EP]
