A presidenta provincial do Partido Popular, Elena Candia, esixiulle ao secretario xeral do PSdeG en Lugo, Álvaro Santos, que se desculpe co presidente da Xunta de Galicia, porque opina que a súa forma de dirixirse a Alberto Núñez Feijóo á hora de facer unha valoración dos orzamentos da administración galega foi a dun "auténtico maleducado".
Santos dixo en rolda de prensa que hai que ser "practicamente un lercho", en clara alusión ao presidente da Xunta de Galicia, para "volver prometer" no debate orzamentario "o que escoitamos ano tras ano que se vai a facer, pero que non se fixo".
"Calquera persoa, xa non só un representante público, debe manter no día a día unhas mínimas normas de educación e de respecto"
"Foi un auténtico maleducado. Creo que o que tería que facer é pedir desculpas. A nós, como o escoitamos moi a miúdo, non nos sorprende. Pero non por iso ímonos a afacer á súa falta de educación", dixo á prensa Candia.
Desde o seu punto de vista, ese tipo de expresións "defíneno" como persoa e como representante político, porque "logo do que vimos neste mandato", debería "coidar" polo menos a súa forma de expresarse para non incorrer en faltas "de respecto institucional e de educación".
"Se non é capaz de controlar outras cousas, polo menos debería coidar iso", insistiu Elena Candia, porque "calquera persoa, xa non só un representante público, senón calquera persoa, debe manter no día a día unhas mínimas normas de educación e de respecto".
Lamentablemente, insistiu a presidenta provincial do PP, "nin iso é capaz de manter".
"O que lle pediría é que se desculpase co presidente da Xunta, o presidente de todos os galegos", resolveu.
