Investigadores da Escola Politécnica Superior de Enxeñería (Epse) do campus de Lugo están a participar nun proxecto europeo, denominado GO-Grass e dotado con dez millóns de euros de financiamento, para estudar o aproveitamento de recursos forraxeiros non utilizados, como a herba sobrante ou os arbustos de terras de baldío, para fabricar biogás, proteína orgánica ou fibra de papel.
Tamén se estuda o seu posible uso para facer camas de gando nas explotacións agropecuarias ou para producir "biochar", unha especie de carbón biolóxico rico en fósforo e con múltiples "aptitudes para o seu uso como emenda para o chan", explica a USC.
Esta nova liña de traballo no ámbito da bioeconomía, subliña a USC, busca "un aproveitamento óptimo dun recurso abundante", dado que "máis da quinta parte da superficie total da Unión Europea esta ocupada por praderías e flora arbustiva".
CONSORCIO. O grupo de investigación Silvopast da Epse, coordinado pola catedrática do departamento de Produción Vexetal, María Rosa Mosquera Losada, participa no consorcio GO-Grass, xunto cun equipo multidisciplinar integrado por 21 socios de sete países europeos: Alemaña, Dinamarca, Suecia, Países Baixos, Bélxica, Romanía e Hungría.
Ese consorcio busca con este proxecto "novas utilidades para esa cota de herba excedentaria e de terras de baldío", para reducir "a importación de nutrientes e a dependencia de combustibles fósiles".
Durante os próximos catro anos, GO-Grass desenvolverá "modelos de negocio efectivos, sostibles e circulares, considerando as circunstancias sociais, económicas e ambientais da contorna rural europeo".
Aproveitando os activos rexionais, GO-Grass "pretende diversificar e revitalizar as economías rurais, así como facilitar oportunidades laborais de calidade e de cooperación entre emprendedores e autoridades locais".
Así, as materias primas obtidas irán "destinadas á produción de produtos bio-baseados, substituíndo aos existentes feitos a partir de materias primas fósiles, talles como fertilizantes ou envases de plástico".