O Concello asinou este martes con Calfensa o contrato para a instalación dunha nova zona de xogos infantís en Campo Castelo, a continuación da que hai agora, que habitualmente está moi chea. A actuación terá un custo de 20.661 euros, comezará de inmediato, segundo asegura o goberno local, e a empresa ten trinta días para facer a obra.
A nova área terá unha dimensión de 5,3 por 10 metros e estará destinada a nenos de ata tres anos. Disporá de saltadores, un balancín, un castelo con tobogán e unha casiña. Calfensa tamén se ocupará do mantemento da infraestrutura durante dous anos.
O goberno local ten en marcha neste momento a mellora e a ampliación de varios parques infantís, dentro do Plan de Barrios. En Albeiros ampliará tanto a parte de 0 a 3 anos como a detinada aos nenos de máis idade. Instalarase un circuíto de habilidades, randeeiras, un carrusel xiratorio inclusivo, unha casiña de xogos con paneis didácticos. Ademais, repararase o pavimento e o céspede artificial, colocarase un valo de madeira e acondicionaranse e repintarán os xogos existentes. A obra foi adxudicada por 67.389 euros a Lappset España, pero aínda non comezou. Lappset tamén fará, por 62.514 euros, o parque infantil previsto na Praza de Bretaña. Esta obra comezará despois do Arde Lucus porque nese lugar haberá instalacións da festa.
O Concello tamén prevé reparar os xogos infantís das rúas Aquilino Iglesia Alvariño e Xosé Novo Freire e este martes licitou, por 25.600 euros, a reposición do parque infantil da peonalizada Praza da Milagrosa. Terá un xogo múltiple "con, alomenos, tobogán de aceiro inoxidable, escaleira e plataforma de transferencia para acceso dende cadeira de rodas inclusiva". As empresas poden presentar ofertas ata o 4 de xuño.
