A Calzada da Ponte será peonalizada na parte máis próxima á ponte romana a pesar de que finalmente non se executará un novo acceso desde A Volta da Viña á N-VI para os vehículos que se dirixan en dirección á Coruña e que agora usan ese tramo de calzada. A Dirección Xeral de Patrimonio da Xunta non autorizou finalmente este novo enlace, que tiña un orzamento 470.000 euros e íase financiar cos fondos europeos do Edusi, polo "seu grande impacto visual" e porque se considera "incompatible" coa protección e conservación do Camiño Primitivo.
O anteproxecto de novo enlace coa N-VI encargado polo goberno local á empresa Inca pretendía crear un carril en sentido descendente e en curva desde a Rúa Santiago, á altura do miradoiro da Volta da Viña, que tería que salvar un desnivel de 9 metros altura ata a estrada. Este acceso obrigaría a eliminar parte da beirarrúa e crear un paso de peóns regulado por un semáforo. Tamén desaparecería parte do actual miradoiro.
Patrimonio considera que a execución deste proxecto suporía a creación dun carril cunha pendente "moi acusada", que ademais prexudicaría a seguridade dos peóns co corte dun tramo de beirarrúa e a creación dun paso con semáforo. Tamén cre que a seguridade na N-VI resultaría "danada" co novo acceso. Así mesmo, advirte de que se eliminaría parte do espazo público do miradoiro e executaríase unha "talla masiva" da masa vexetal existente na ladeira da estrada para construír novos noiros e muros de contención.
Todas estas actuacións afectarían, segundo Patrimonio, a un ben Patrimonio da Humanidade como é o Camiño Primitivo, ao quedar desfigurado ese contorno urbano cun grande impacto visual. Engade que a perspectiva que se podería contemplar desde a ponte romana "quedaría danada ao modificar as condicións ambientais e topográficas do lugar".
Finaliza o informe do ente da Xunta declarando "desfavorable" o proxecto e salientando que "no territorio histórico as infraestruturas, e máxime ao pé da grande arteria fluvial que é o río Miño, deben deseñarse con criterios de integración paisaxística".
