A Garda Civil detivo en Lugo a 13 persoas, de entre 18 e 40 anos, que integraban un grupo criminal organizado que cometeu polo menos 18 roubos en establecementos da provincia e outros dous en casas deshabitadas, obtendo un botín de 35.000 euros.
A investigación iniciouse en xullo do ano pasado tras os roubos rexistrados en naves industrial que se dedican á subministración agrogandeira. Nalgún caso asaltaron en dúas ocasións o mesmo negocio, o que causou, segundo informa a Garda Civil, "gran desasosego e inseguridade" ás vítimas.
Os ladróns desprazábanse desde Lugo aos lugares onde cometían os roubos. Para iso utilizaban vehículos da súa propiedade ou de familiares. Cinco deles conducían a pesar de non ter carné.
Mentres un esperaba no exterior en labores de vixilancia, os outros membros cometían o roubo. A Garda Civil asegura que algún tiña "un grao de especialidade e preparación" para forzar os bombines das fechaduras.
Os roubos en establecementos cometéronos en toda a provincia, desde Ribadeo ata Quiroga, pasando por Cospeito, A Fonsagrada, Sarria ou Palas de Rei, e as casas deshabitadas foron en Friol e Castro de Rei.
