Buscan a un condutor que se fuxiu tras chocar contra un coche aparcado

A Policía Local busca a un condutor que se deu á fuga este sábado logo de estrelar o seu vehículo contra outro que estaba aparcado, a plena luz do día. Os feitos sucederon ao redor das nove da mañá na Rúa das Fontes, na Piringalla. 

Segundo relatou a este diario a propietaria do vehículo afectado, un Mercedes Clase A, "acababa de aparcar fronte á casa da miña avoa e nada máis entrar ao portal escoitei un forte golpe. Saín de inmediato, pero se foi a tal velocidade que non me deu tempo a ver toda a matrícula". 

Si que puido, no entanto, facilitar as características do vehículo aos axentes da Policía Local que acudiron a realizar o ateigado, que contarán ademais cunha axuda extra que non previra o fuxido: dada a violencia do golpe, no lugar do accidente quedaron varias pezas do seu propio coche, algunha delas con número de serie. 

Pola súa banda, o vehículo aparcado quedou "sinistro total", en palabras da súa propietaria, que explicou que ata lle deixou partida a barra da dirección e tivo que ser transportado nun guindastre. 

"O peor é que encima se marchou a toda velocidade nunha rúa na que hai dous pasos de peóns. Se chega a coller a alguén a esa velocidade mátao e déixao aí tirado", lamenta a lucense afectada.