A Policía Local de Lugo investiga o accidente de tráfico que sufriu na noite do mércores ao xoves un camión, que se deu á fuga tras case derrubar un poste de formigón do tendido eléctrico que se atopa na estrada de Orbazai, á altura do barrio de As Illas.
O chofer do vehículo pesado puido perder o control na curva pechada que está na ponte sobre o río Segade, transitou pola cuneta e acabouse estrelando contra o alicerce da iluminación pública que se atopa alén da calzada.
Operarios municipais acordoaban este xoves pola mañá a zona con valos, como medida de seguridade, e xa pola tarde a compañía eléctrica iniciaba os traballos correspondentes para substituír este poste.
QUEIXAS VECIÑAIS. Por mor deste accidente de circulación, os veciños de As Illas volveron pedir ao Concello de Lugo, que adopte medidas para mellorar a seguridade viaria nesta zona, na que advirten de que os vehículos circulan a excesiva velocidade.
Os residentes deste barrio da parroquia de San Miguel de Orbazai xa solicitaron que se ensanche a ponte porque é estreita e a duras penas pasan dous vehículos. Ademais, propoñen que se habiliten beirarrúas porque é unha zona frecuentada por camiñantes e adolescentes en bicicleta.
