O home de nacionalidade búlgara que foi detido hai unhas semanas pola Policía Nacional en Benidorm, vinculado coa violación dunha moza e outros dous intentos nun bloque de vivendas de Augas Férreas, está xa na prisión de Bonxe, á que foi trasladado o pasado sábado. Este cambio de destino está relacionado coa instrución xudicial que leva a cabo en Lugo relacionada cos feitos que se lle imputan.
O detido, de 26 anos de idade, é sospeitoso de cometer varios asaltos de carácter sexual en Lugo, mentres traballaba na cidade como instalador de telefonía, aínda que tiña a súa residencia en Madrid. Os feitos producíronse en setembro de 2016, pero a Policía non puido confirmar as súas sospeitas ata datas recentes, cando se lle tomaron mostras de ADN por outra causa distinta da que ten aberta nos xulgados lucenses e puidéronse cotexar cos resultados das probas en restos biolóxicos aparecidos nos asaltos de Lugo.
No momento dos feitos, o home carecía de antecedentes policiais e, a pesar de que a Policía centrou as súas sospeitas nel, desde fases temperás da investigación non dispuña dunha proba concluínte que os vinculase cos delitos cometidos en Augas Férreas, todos eles no mesmo inmoble de Estrada da Granxa. Nos dous primeiros ataques, o asaltante obrigou ás mulleres a entrar no ascensor e levounas pola forza a un cuarto do garaxe, que tamén foi o escenario do terceiro asalto.
Estas agresións sexuais crearon un estado de alarma na cidade, especialmente na zona do campus.
