Unha alarma polo intenso fume que saía da cheminea dun inmoble, sito no barrio da Milagrosa, puxo este sábado en evidencia a falta de medios de seguridade na capital lucense.
Os bombeiros -que o sábado só tiñan catro efectivos, un dos cales tiña que permanecer nas instalacións para atender posibles chamadas- desprazáronse pasadas as seis e media da tarde á Rúa Curros Enríquez, xa que un veciño comunicou que saía fume intenso dunha cheminea e que se percibía cheiro a queimado na vía publica.
Os bombeiros estacionaron os dous camións nun carril da rúa, onde tamén aparcou a ambulancia, e solicitaron a presenza da Policía Local para regular o tráfico e para apoialos se fose necesario entrar nalgún domicilio particular. Con todo, non recibiron apoio policial porque todos os axentes dispoñibles atopábanse nese momento regulando a carreira do Corre con Nós.
Así, durante o tempo que durou a intervención dos bombeiros, que se prolongou durante aproximadamente unha hora, ninguén organizou a circulación viaria na zona, co perigo que iso leva para condutores e peóns.
Finalmente, os bombeiros comprobaron que o fume que saía da cheminea dun inmoble -que ten a entrada pola Rúa Divina Pastora- debíase a unha mala combustión e o suceso saldouse sen maiores consecuencias.
