Unha brigada dos bombeiros accedeu onte á vivenda dunha muller para que os servizos sanitarios puidesen socorrela pero a casa estaba baleira. Os bombeiros foron mobilizados a requirimento do 112, así como unha patrulla da Policía Local, porque non podían entrar no piso. Pola tarde recibiran unha chamada alertando de que unha muller que sofre frecuentes hipoglucemias non acudira ao seu traballo e temíase que estivese sen asistencia na súa casa.
Unha vez na vivenda, situada na Avenida Adolfo Suárez, os sanitarios comprobaron que ninguén respondía ao chamar á porta, nin tampouco no móbil da muller, que ouviron soar no interior. Probaron sorte coa chave dunha veciña pero tampouco puideron entrar xa que a porta contaba cun pasador máis que fora pechado desde dentro da casa e, por ese motivo, decidiron pedir axuda dos bombeiros.
Finalmente, estes lograron acceder ao piso a través dunha fiestra e comprobaron que a vivenda estaba baleira. Pouco despois a muller chegou ao seu domicilio e comprobaron que non sufría ningún tipo de indisposición.
CAN PERIGOSO. Por outra banda, a Policía Local tamén recibiu unha denuncia porque un home se atopaba na Praciña do Colexio, lugar de reunión de moitos mozos, cun pitbull, can dunha raza potencialmente perigosa. Non contaba coa preceptiva licenza para esa clase de animais e, ademais, levábao sen boceira.
