O Boletín Oficial do Estado (BOE) publicou este mércores o Real Decreto polo que se crea un novo Xulgado do Social en Lugo, unha vella demanda na cidade motivada pola acumulación de casos e o atraso na citación de determinados procedementos, con datas previstas para dentro de dous anos.
De feito, ademais dos propios sindicatos -algúns como a CIG chegaron a desenvolver campañas para esixir a creación dese xulgado-, tamén se sumaron a esa demanda institucións como o Concello de Lugo e a comisión mixta, formada pola Xunta de Galicia e o Tribunal Superior de Xustiza de Galicia, solicitáronlle formalmente ao Ministerio de Xustiza a súa creación.
A subdelegada do Goberno en Lugo, Isabel Rodríguez, recoñecía este mércores que se trata dunha “importante noticia para Lugo, dado que o novo xulgado axudará a aliviar a importante carga de traballo na xurisdición social, que se viu agravada como consecuencia da crise provocada pola pandemia”.
Segundo a subdelegada, a creación do novo xulgado “reafirma o compromiso con Lugo por parte do Goberno e, concretamente, por parte do ministro de Xustiza, Juan Carlos Campo”.
De feito, a creación do cuarto Xulgado do Social de Lugo foi incluída no plan de actuación de medidas urxentes contra a pandemia, co que se trata de aliviar a extraordinaria carga de traballo que motivou a crise sanitaria nos órganos xudiciais”, precisou.