O candidato do BNG á alcaldía de Lugo, Rubén Arroxo, anunciou este martes un plan piloto de compostaxe que se compromete a pór en marcha "cando cheguemos ao goberno da cidade", que consistirá na creación de dez illas, con colectores comunitarios.
O BNG recordou que Allariz xa apostou por este sistema hai tempo e que, tras tres anos de funcionamento, conseguiu xestionar por este sistema o 20% do lixo que vai ao colector de residuos orgánicos. "Se en Lugo fóramos capaces de xestionar tan só a mesma porcentaxe teríamos un aforro de arredor de 468.000 euros tan só no canon de Sogama. Se lle sumamos outros custos, como o transporte ou a recollida, pódese aproximar ao millón de euros de aforro para as arcas municipais", explicou Arroxo.
O alcaldable nacionalista recordou que o Concello de Lugo envía o seu lixo á planta de incineración de Sogama, en Cerceda, onde se recicla só o 11%, apuntou, "moi por debaixo da media estatal, que rolda o 30%". "Ademais, non están a lograrse os obxectivos marcados pola Lei de Residuos da Xunta, cifrados en acadar non 2020 ou 50% da reciclaxe dos residuos urbanos", recordou.
O BNG considera imprescindible pór en marcha un plan de compostaxe para mellorar a reciclaxe, na liña co que, ademais, establece a UE para os próximos anos.