Varios billetes falsos foron detectados nos últimos días en establecementos de Lugo. Este diario puido confirmar polo menos tres casos, un dun billete de 50 euros e dous de billetes de 10.
O primeiro deles en circulación detectouse a semana pasada e a Policía Nacional está a investigalo, tras recibir a correspondente denuncia. Un hostaleiro lucense foi a depositar o diñeiro da caixa no seu banco habitual e alí advertíronlle de que un dos billetes de 50 era falso. Nestes casos, os bancos teñen a obrigación de reter o billete e dar conta á Policía; o que perde o diñeiro, se non se atopa o culpable, é o cidadán que foi enganado.
Polo que parece, a falsificación deste billete de 50 euros sería de boa calidade, xa que é moi difícil poñer en circulación moeda de tanto valor porque a maioría de establecementos xa conta con detectores e os que non o teñen (como moitos locais de hostalería) adoitan prestar unha atención especial a estes billetes.
Moito máis fácil e menos esixente é poñer en circulación billetes de 5 ou de 10 euros. Destes últimos foron localizados polo menos dous nos últimos días, aínda que non se interpuxeron denuncias ante a Policía Nacional. Ambos foron detectados cando os seus propietarios foron pagar con eles nun establecemento, e nos dous casos sospeitan que procedían de cambios recibidos en bares da rúa dos viños.
FOTOCOPIAS. Trátase de fotocopias en cor de alta calidade, pero que se poden detectar cunha análise a primeira ollada. As persoas afeitas a traballar con billetes (comerciantes e hostaleiros, por exemplo) incluso poden sospeitar só co tacto, xa que os billetes auténticos están confeccionados cunha microfibra moi especial, non con papel.A Policía Nacional non cre que se trate dunha gran remesa
Ademais, nos auténticos a banda prateada dun dos lados está integrada no propio billete, mentres que nos falsos está pegada e os debuxos tampouco son os mesmos. Para rematar, non levan nin a liña ancha e escura que os atravesa de arriba a abaixo nin a marca de auga que pode verse a contraluz nos auténticos.
Con todo, son billetes moi fáciles de coar entre outros á hora de pagar ou de recibir cambios. Cun problema engadido: ao ser de baixo importe, moitas veces os cidadáns que os reciben deciden volver poñelos en circulación cando se dan conta, para aforrarse as molestias de presentar a denuncia e non perder o diñeiro correspondente. No entanto, a Policía advirte sobre esta práctica porque pode traer máis problemas do que podería parecer: o cidadán podería enfrontarse a un delito de falsificación de moeda.
No caso dos detectados en Lugo, a Policía Nacional non cre que se trate dunha gran remesa porque as denuncias non aumentaron substancialmente, senón dalgún pequeno delincuente que puido realizar un número limitado de fotocopias.
