O avogado Cándido Conde Pumpido, defensor do antigo presidente da Deputación Provincial de Lugo José Ramón Gómez Besteiro no chamado caso Garañón, anunciou que presentará recurso contra o auto da xuíza Pilar de Lara e estuda a posibilidade de denunciala por "prevaricación xudicial". Como el, tamén o exalcalde de Lugo José López Orozco asegurou que a súa intención é "recorrer".
As presuntas irregularidades sobre a urbanización do Garañón deu lugar á apertura dunha instrución por vía penal en cuxo sumario foron imputados como investigados o exalcalde José López Orozco e Gómez Besteiro, que exerceu de concelleiro de Urbanismo en Lugo e foi secretario xeral dos socialistas galegos.
Orozco: " A xuíza sabe mellor que ninguén que todos os funcionarios e os políticos actuamos conforme a dereito"
En declaracións a Efe, Conde Pumpido asegurou que está a estudar emprender "outro tipo de accións" pola actitude exhibida pola xuíza, desde "expor outra queixa ante ao Consello Xeral do Poder Xudicial", ata outras accións "de maior calado" se se aprecian no seu comportamento indicios de "prevaricación xudicial".
Asegurou que o auto foi presentado pola xuíza "de forma intempestiva", xusto antes de que se coñeza a decisión do Consello Xeral do Poder Xudicial sobre a sanción que podería apartala do xulgado de instrución número 1 de Lugo.
Conde Pumpido: "Co contido político que ten a causa e facéndoo desta forma, estamos a valorar se pode ser incluso prevaricador (o auto xudicial)"
No devandito auto, "a xuíza incide en todas as artimañas que lle trouxeron estas consecuencias", porque "leva meses sen facer absolutamente nada" no que se refire a dilixencias de investigación, pero aínda así "prorrogando" a instrución.
"Agora dita esta resolución en vésperas dun proceso electoral. Facendo o maior dano posible", engadiu, e aínda sabendo que "a Gómez Besteiro nin sequera se lle tomou aínda unha declaración válida".
OROZCO. Pola súa banda, o exalcalde de Lugo José López Orozco asegurou que a súa intención é "recorrer" e "con total tranquilidade" o auto ditado por De Lara. "Hai que ver que présa tiña a señora xuíza", dixo.
"Recorreremos, con total tranquilidade", insistiu, porque "a pesar todos os razoamentos xurídicos" que expón a maxistrada nese auto, "non hai absolutamente nada".
O rexedor local insistiu en que baixo o seu mandato o goberno local de Lugo tentou "reducir a edificabilidade nunha zona moi difícil" e nun "edificio que non lle gusta a ninguén". Na mesma liña, asegurou que como alcalde sempre obrou de forma correcta, de acordo cun "procedemento administrativo" sempre amparado "polos informes técnicos".
"Total tranquilidade. Non me afecta. Se cal foi o meu comportamento. Nin as fixen nin as temo", concluíu.
