O bebé de dous meses, ingresado no Hula desde o pasado venres vítima de presuntos malos tratos será trasladado ao hospital da Paz, en Madrid, para ser intervido dun desprendemento de retina.
O centro madrileño é o hospital de referencia para cirurxías deste tipo en neonatos.
O pequeno, hospitalizado na unidade de Neonatos do Hula, atópase estable e a tratamento desde o seu ingreso. Non foi intervido ata agora xa que o Hula non é un centro que conte na súa carteira de servizos con cirurxía pediátrica nin de neonatos.
A Xunta asumiu xa a "tutela urxente" do menor e realiza o seguimento do caso priorizando a procura dun acollemento familiar. Explicouno este mércores a directora xeral de Familia, Amparo González, quen apuntou que neste caso a Administración actuará "sempre buscando o maior beneficio para o menor".
A directora xeral asegurou que neste caso os procedementos activáronse de forma "moi inmediata", xa que se detectaron "indicios probados" de que o bebé se atopaba nunha situación de "desamparo", polo que a Xunta asumiu de forma "urxente" a tutela do menor.
Tras ingresar no Hospital Lucus Augusti con signos de malos tratos, activouse o protocolo para ese tipo de casos e a xuíza, unha vez examinados os datos e despois de que se lles tomase declaración aos pais, ditou un auto no que outorgaba a tutela urxente á Xunta e decretaba o afastamento dos proxenitores.
"Estudarase se pode haber un acollemento por parte da familia extensa ou se hai que ir a unha familia allea", sinalou Amparo González
Agora, os servizos de menores da Administración autonómica realizarán un "seguimento" da situación sanitaria do menor, que permanece hospitalizado, achegando "toda a cobertura que poida necesitar" en calquera sentido. Paralelamente, traballan para "buscar o mellor recurso" para o bebé unha vez reciba o alta. De xeito prioritario será de acollemento familiar, ben con familia extensa do menor ou allea.
"Estudarase se pode haber un acollemento por parte da familia extensa ou se hai que ir a unha familia allea", sinalou Amparo González, para o que se terá en conta a situación da "contorna" do menor. En calquera caso, manterase o seguimento ao bebé, para o que a Administración galega traballará en coordinación con servizos sociais, médicos e outros organismos vinculados co menor.
A directora xeral de Familia recordou a existencia do Teléfono da Infancia, 116 111, ao que "calquera persoa" pode chamar "se nalgún momento teñen coñecemento ou sospeita dunha situación de risco", para que esta sexa analizada polos servizos técnicos do menor.
