A cadea Be One, cuxo director xeneral é o empresario lucense Roberto Ramos, anunciou este martes o comezo das obras de remodelación do novo centro deportivo que a firma abrirá en Lugo, concretamente situarase no antigo edificio que ocupaba a discoteca Sugar, na Rúa Cornubia da capital.
A firma Serviocio, propietaria da cadea de ximnasios, asegura que o investimento previsto para a remodelación do edificio e a dotación de equipamentos roldará os 3.800.000 euros.
Calcúlase que as obras terán unha duración de seis meses, polo que a apertura está prevista para xaneiro de 2022.
As instalacións contarán con 3.900 metros cadrados, dos cales 950 estarán dedicados á sala fitness, con maquinaria de última xeración e tecnoloxía intelixente; e 710 a cinco salas de actividades dirixidas, unha delas dedicada exclusivamente a ciclo indoor.
Ademais, ofrecerá máis de 100 clases á semana e disporá de zona de augas con strong <>piscina climatizada e spa con baño de vapor, bañeira hidromasaxe, sauna, pediluvio, duchas de contraste, nebulizadas e en fervenza.
Be One tamén ofrecerá unha zona de aparcadoiro para uso exclusivo dos seus socios.
FAMILIAS. BeOne outorgaralle especial importancia ás familias e contará cun abono con diversas vantaxes para elas. Disporá de ludoteca e de actividades e escolas para os máis pequenos, como a de natación.
A empresa aplicará desde o primeiro día un modelo de xestión centrado en innovadores protocolos de traballo centrados no cliente que implican unha gran oferta de actividades dirixidas de última tendencia e servizos como a asesoría deportiva, o adestramento personalizado e unha aplicación móbil que axudará aos usuarios no seguimento da súa actividade e a consecución dos seus obxectivos deportivos.
Serviocio dedícase a xestionar instalacións deportivas tanto de administracións públicas como propias e explota 35 centros en Andalucía, Cantabria, Castela e León, Madrid, País Vasco e Valencia. En Galicia xestiona unha ducia, só un deles en Lugo, a piscina de Ribadeo.
Antes de que se desatase a crise sanitaria este grupo empresarial contaba con máis de 1.200 traballadores e atendía a uns 168.000 usuarios mensualmente.
