A oficina que BBVA ten na Rúa San Marcos pecha este venres as súas portas ao público. Esta medida enmárcase dentro do plan de reorganización que está a levar a cabo a entidade financeira presidida por Carlos Torres, que o pasado 1 de xaneiro relevou ao chantadino Francisco González.
Os clientes desta céntrica sucursal terán que acudir a partir do próximo luns a realizar os seus trámites á oficina principal, que se atopa na Rúa da Raíña, ou a algunha das outras tres con que conta na capital lucense.
BBVA, que é a segunda entidade financeira de España por volume de activos, está a adelgazar a súa rede física. No primeiro semestre deste ano ten previsto pechar 111 oficinas, polo que quedaría con máis de 2.700 en todo o Estado.
O banco azul desfíxose nos últimos tres anos dunha cuarta parte das oficinas que tiña no noso país, ao redor dun milleiro.
Este banco, con domicilio social en Bilbao e máis dun século e medio de historia, está inmerso nun proceso de dixitalización e de cambio da atención aos seus clientes, que pretende que sexa máis personalizada a través de xestores de distintas áreas. Como outras insignias, está a apostar por implantar grandes oficinas, duns 1.000 metros cadrados. Recentemente reformou a da Rúa da Raíña, onde centraliza os seus servizos a empresas.