Lonxe de converterse en solución, a determinación como área restrinxida do pantalán situado na zona dos Carballos levou aos bañistas lucenses a buscar altenativas para combater as tardes de calor, aínda que estas parecen menos seguras. A inexistencia dunha praia fluvial adaptada apelou ao enxeño dos usuarios, que, tras barallar todas as opcións, chegaron á conclusión de que o máis apto -e viable- era seguir frecuentando esta paraxe, que pide a berros unha remodelación.
Para chegar á auga do Miño, os bañistas empregan os accesos contiguos ao pantalán prohibido, entre os que se comprenden diferentes escaleiras e ramplas cuxa estabilidade e seguridade queda en dúbida. O que ten un maior éxito e número de visitas é o outro embarcadoiro, o do club de piragüismo, a pesar de que o seu uso se ve limitado pola actividade dos remeiros.
O pasado mércores, día festivo, "varios mozos bañáronse nesas instalacións" segundo informan socorristas que vixían a zona. "Os mozos séguense bañando. Principalmente usan os accesos próximos ao club de piragüismo, a pesar de que son unhas instalacións que non sempre están dispoñibles", explican.
Outra das baixadas preferidas polos lucenses son unhas escaleiras que se sitúan entre ambos os embarcadoiros. "Son válidas para subir, baixar e darche un mergullo, pero non che permiten máis que iso", como comentan dous mozos que recorreron aos seus servizos na tarde deste xoves.
O resto de alternativas son en grao sumo variadas. Identifícanse desde unha rampla ata unha estrutura de cemento, pasando por camaleónicas microplayas fluviais construídas pola dirección do propio río. Con todo, ningunha delas cumpre os requisitos que se lle presupón a un acceso seguro ou fiable para bañistas.
SOCORRISTAS. Desde o peche do pantalán, o labor dos socorristas non variou o máis mínimo -manteñen o seu horario desde as 11.00 horas ata as 20.00 e percorren as beiras do Miño para garantir a seguridade dos usuarios-, a pesar de que "hai menos traballo" xa que a principal zona de actuación destes vixiantes atópase vedada. "Seguimos facendo o mesmo, damos longos paseos para controlar a totalidade da extensión, a pesar de que se baña menos xente desde a prohibición de acceso ao embarcadoiro", apuntan.
Son catro os profesionais contratados polo Concello para controlar a zona. O equipo divídese en dous grupos de dous e traballarán por quendas ata que acabe o período estival a mediados de setembro.
Estes teñen completos equipos para actuar en caso de incidencia, as que polo momento non se produciron. Ademais, contan cun número de asistencia a través do que poden recibir avisos para acudir ao lugar correspondente ante calquera problema.
O seu labor vai máis aló do simple control de bañistas, xa que son os encargados de garantir a saúde ambiental do río, polo que deberían intervir ante a presenza de calquera corpo estraño na auga, como sucedeu o pasado ano cun colector e unha moto.
PISCINA. A piscina dos Carballos é a opción -de pago- máis próxima ao río. Son moitos os bañistas que a ela acoden ao longo do verán para refrescarse, unha afluencia que non se incrementou desde o peche do pantalán, segundo asegura unha das traballadoras. "O peche do embarcadoiro non nos afectou, non ten nada que ver, non notamos diferenza, nin para mellor nin para peor", explica.
No entanto, indica que están a recibir a bastantes bañistas estes días de calor, nos que a tarifa de 2,5 euros para nenos e 3,5 euros para os adultos, convencen ás familias como opción para paliar as altas temperaturas.
