Unha banda especializada en asaltar as máquinas de chuches que campa ás súas anchas pola cidade trae de cabeza á empresa concesionaria do servizo de vénding nas instalacións do Concello de Lugo, despois de que nos últimos meses sufra uns 40 asaltos que lle causaron perdas por valor de 60.000 euros.
A última acción por parte destes cacos rexistrouse na noite do sábado ao domingo, cando foron abertas e danadas as máquinas instaladas no Palacio Municipal dos Deportes, nos campos de fútbol das Gándaras e no pavillón Daniel Cordido da Piringalla. A empresa afectada decidiu acoirazar as máquinas por mor dos primeiros asaltos rexistrados no verán e colocarlles máis fechaduras, pero os asaltantes decidiron entón utilizar instrumental contundente para tratar de abrilas e levar a recadación, o que acabou por causar máis danos se cabe ao quedar moitos dos aparellos esnaquizados.
Incluso, segundo explican desde a compañía, decidiron cambiar os días de retirada da recadación, aínda que cren que a banda está a facer un seguimento dos reponedores, porque sempre sofren os asaltos antes de que sexan baleiradas.
Un dos socios da empresa acudía este mesmo domingo á comisaría da Policía Nacional para denunciar os asaltos sufridos durante o fin de semana, así como os do último mes, onde en total foron rebentadas 11 máquinas, ás que lles foron causados danos estimados en 13.100 euros. Os ladróns levaron tamén 3.120 euros da recadación en billetes e moedas.
Unha das empresas que sufriu desfeitas pide ao Concello que instale polo menos alarmas nas instalacións municipais
Ademais das tres instalacións municipais que foron asaltadas neste período -o Palacio Municipal dos Deportes en dúas ocasións-, os ladróns roubaron no polideportivo do Palomar. Ademais, a empresa sufriu desfeitas nas máquinas que ten colocadas na rúa na Calzada das Gándaras.
A firma, que quere que o Concello instale polo menos alarmas nas instalacións municipais, estase expondo retirar as máquinas daqueles puntos onde xa entraron varias veces porque as perdas polos roubos e desfeitas non compensan a recadación das mesmas.
