O delegado territorial da Xunta en Lugo, José Manuel Balseiro, espera que a cita a tres bandas que reuniu o luns a Adif, Consellería de Infraestruturas e Concello sirva para desbloquear a construción da estación intermodal da capital lucense. O popular asegurouno este martes á vez que deslizou algún reproche, porque dixo que ata agora só o Goberno galego demostrou que "ten as ideas claras" mentres que os demais interlocutores se dedicaronse "a enredar".
As súas palabras xa tiveron resposta desde o Concello de Lugo, que rexeita a acusación e apunta que Balseiro "enreda e mente" nun tema no que "deben primar a lealdade institucional e os intereses de Lugo sobre todo o demais". "E non os intereses partidistas".
Replica así ás palabras de Balseiro, que, en declaracións aos medios de comunicación, expresou a satisfacción da Xunta por que se deu algún paso" coa intermodal pero deslizou que "o Concello o único que fixo en todo este tempo foi enredar, o mesmo que o Goberno desde que está Pedro Sánchez". "Desexamos que esa intermodal vaia para adiante", dixo, para subliñar tamén que a Xunta é a única administración que "ten as ideas claras, sabe o que vai facer e ten previsto o investimento", porque "vai licitar o proxecto [para a estación de autobuses] a finais deste verán".
"Non sei o que nos veu a contar o señor ministro de Fomento, porque o luns quedou claro que só veu falar de catro raias que pintaron" sobre un papel, "porque o proxecto non o teñen e o anteproxecto tampouco", preguntábase Balseiro.
Desde o seu punto de vista, este luns "polo menos recoñeceron algo", que "hai que asinar un convenio" a tres bandas para "deixar claro cales van ser as obras que vai facer cada administración". "Hai que ver que parte do diñeiro ten que pór cada administración", porque Adif ten que facer a estación de tren, a Xunta a terminal de autobuses e o Concello de Lugo os accesos.
"Ese convenio hai máis dun ano que foi remitido pola Xunta a Adif e ao Concello de Lugo, pero a día de hoxe aínda non está asinado", dixo Balseiro, quen comentou que se se asinase no seu momento, probablemente as obras estarían a empezar agora". Nese punto, opina que "se a reunión serviu para desbloquear as cousas e para facelas como a Xunta xa viña dicindo que tiñan que facerse, benvida sexa".
CONCELLO. Fronte ás palabras do delegado da Xunta, fontes do Concello asegura que nin a administración local nin Adif "enredan" e que desde que se pecharon as reunións técnicas a finais de xaneiro tanto esta como Adif "puxéronse a traballar".
A partir de aí, a administración local expresa a súa estrañeza ante as declaracións de Balseiro, que asegura que "enreda" despois de que a propia conselleira de Infraestruturas mostrase o luns a súa disposición a avanzar no convenio e, dese modo, a "remar todos en común en favor de Lugo".
"O Concello pide, como vén facendo sempre, lealdade institucional e lealdade aos lucenses. Nesta lealdade sempre atoparán a Lara Méndez e ao Concello de Lugo", aseguran fontes municipais, que apostan por que haxa "menos ruído no tema partidista e máis ruído de xestión en favor de Lugo".
