O delegado da Xunta de Galicia en Lugo, José Manuel Balseiro, criticou este venres ao goberno bipartito da cidade por non "saber que facer" co novo auditorio de Magoi, á espera de ser recepcionado polo concello.
Balseiro afeou que desde o goberno municipal se pida a convocatoria dunha mesa técnica, unha especie de "auditoría", en lugar de contar cun programa para encher de contido esta instalación, "a mellor infraestrutura cultural" da provincia, para a que a Xunta "puxo o terreo" e "22 millóns" de euros e adiantou o diñeiro para equipalo.
"No canto de estar a pedir unha comisión de técnicos tiña que ter elaborado un programa cultural para encher de contido cultural esa grande instalación pagada pola Xunta con diñeiro de todos os galegos, eu creo que o se pretende con isto é única e exclusivamente enredar porque o goberno municipal non sabe que facer con esas instalacións que están practicamente concluídas para en calquera momento sentar e chegar a un acordo e facer esa cesión", subliñou.
Balseiro incidiu en que "non ten ningún sentido" esta actuación salvo "para enredar", entendendo que "ninguén porá en dúbida as certificacións dos técnicos que fixeron o auditorio".
