O delegado territorial da Xunta de Galicia, José Manuel Balseiro, acusou este mércores á alcaldesa de Lugo, Lara Méndez, de facer "demagoxia" con respecto á actividade dos aparcacoches que exercen a súa actividade de forma ilegal na contorna do Hospital Universitario Lucus Augusti (HULA), porque "nin controlan aos gorrillas, nin fan novos aparcadoiros" nas inmediacións do centro sanitario.
Balseiro fixo estas declaracións despois de que a alcaldesa informase onte sobre un operativo da Policía Local para identificar aos gorrillas que exercen a súa actividade na contorna do Hula, unha comparecencia na que volveu pedirlle á Xunta de Galicia que interveña para rebaixar os prezos do aparcadoiro subterráneo do hospital, que a rexedora local considera "abusivos".
"Desde a Xunta fixemos o que nos correspondía, pero a alcaldesa non está a facer o seu traballo. Nin controlan aos gorrillas nin fan novos aparcadoiros na contorna do HULA, que é a súa competencia", dixo o delegado.
De feito, recordou que o coñecido como Leiraparking, un aparcadoiro público municipal situado a poucos metros da entrada principal do Hula, "foi unha chapuza", porque ten que estar "pechado continuamente para facer reformas", cando non está convertido "directamente nun bulleiral".
Desde o seu punto de vista, o Concello está "obrigado a proporcionar novos espazos de aparcadoiro na contorna do hospital, algo que non está a facer, a pesar de que hai terreos dispoñibles".
Sobre a rebaixa que pide nas taxas do aparcadoiro público do Hula, dixo que "podería comezar por facela nos propios", nos que son concesión do Concello de Lugo, "sobre todo agora que, por decisións do goberno local, están a reducirse as prazas de estacionamento na cidade e sen ningunha alternativa".
