A demora na constitución do novo Executivo central e a posibilidade nada desatinada de que se convoquen outros comicios lexislativos para o 10-N están a contribuír a que os contados proxectos de infraestruturas previstos para a provincia de Lugo aumenten a súa xa tradicional querenza a atrasarse. Un deses proxectos que a inestabilidade política propicia que se balancee sobre o arame como un funambulista é a ensoñada estación intermodal da capital lucense, onde deben convivir nun futuro que non debería ser moi afastado o transporte de viaxeiros en tren e en autocar.
Hai catro meses o ministro de Fomento, José Luís Ábalos, presentaba no consistorio lucense o anteproxecto da intermodal no que se teñen que implicar outras dúas administracións, a Xunta de Galicia e o Concello de Lugo. Estimaba entón que suporá unha investimento global superior aos 30 millóns de euros e prevía que o ano que vén xa se poderían iniciar as obras da terminal do ferrocarril, cun custo próximo aos cinco millóns. En abril o Administrador de Infraestruturas Ferroviarias (Adif) licitaba os servizos de consultoría e asistencia técnica para a redacción dos proxectos básico e de construción da estación do tren, cun prazo de execución de 15 meses.
PERDERASE O TREN?
A espada de Damocles pende como non de novo sobre a modernización ferroviaria, que segue sendo o gran cabalo de batalla en materia de infraestruturas na provincia. Este ano prevíanse case 14 millóns para a electrificación, renovación e construción de variantes na maltreita liña Monforte- Lugo para adecuala con vistas á súa futura conexión á alta velocidade. Se a circulación, día si e día tamén, retárdase na Autovía do Cantábrico (A-8), ao seu paso polo Fiouco, entre Abadín e Mondoñedo, debido ás condicións meteorolóxicas, a solución a ese mal endémico da néboa tamén.
Os Orzamentos Xerais do Estado prevían este ano unha partida de cinco millóns de euros para adquirir sistemas antinéboa que remediasen o trastorno que sofren os condutores, sobre todo no verán, cando máis tránsito rexistra esta autovía. Pero esa proposta de contas anuais foi tombada no Congreso, o que foi un dos desencadenamentos da convocatoria de eleccións lexislativas para o 28-A. Case tres meses logo desa cita coas urnas aínda non hai fumata branca, nin se espera.
Non só están no aire proxectos para esta autovía que vertebra a Cornixa Cantábrica, tampouco se libran os doutras que atravesan a provincia de Lugo. A A-76, que comunicará Ourense con Ponferrada, contempla a circunvalación de Monforte de Lemos, obra para a que se orzou este ano case medio millón de euros. Na Mariña, ademais do atraso na solución dos problemas do Fiouco, tamén poderían verse afectadas outras dúas infraestruturas, a impresindible rehabilitación do firme da Nacional 642, unha das alternativas á A-8, e o tramo da A-74, entre San Cibrao e Burela.
Os seis proxectos que precisan un investimento estatal e que poderían quedar paralizados.
