Axentes da Policía Local de Lugo tiveron que intervir en dúas ocasións unha reunión nun piso o pasado sábado de madrugada, como consecuencia das molestias que provocaba aos demais veciños, pois nela estaban a participar, ademais dos inquilinos, outras tres persoas non conviventes.
Segundo informou a propia Policía Local, unha patrulla do Grupo Operativo Nocturno desprazouse ás 01:15 horas do día 13 de febreiro a unha vivenda do Sagrado Corazón, logo de veciños da zona chamasen ao 092 para denunciar que non se lles permitía descansar.
Ao chegar, os axentes comprobaron que, efectivamente, escoitábase cun volume moi alto o son dun televisor, polo que chamaron á porta e pedíronlle ao responsable que o baixase, algo que fixo de forma inmediata. Con todo, pouco tempo despois, a sala do 092 volveu recibir denuncias pola persistencia deses “ruídos molestos”, o que fixo que os axentes regresasen ao domicilio e identificasen a todas as persoas que había dentro.
Así comprobaron que tres desas persoas non eran convivientes, de modo que foron denunciadas por incumprir as medidas decretadas polas autoridades sanitarias para frear a expansión da pandemia. A proposta de sanción é de 500 euros para cada unha delas.
Ademais, os axentes levantaron acta por unha infracción da Ordenanza de Protección Ambiental, por mor dos “ruídos” que molestaban aos demais veciños".
