O medo avanza moito máis rápido que o propio coronavirus o seu efecto está a deixarse notar xa nas axencias de viaxes de Lugo, moitas das cales rexistraron cancelacións. No entanto, temen que o peor, se a situación non se controla e a psicose non se frea, estea por chegar e contaxie de gravidade a campaña de Semana Santa.
Nadia Abelleira, da axencia Mandala Aventura, recoñece que ata agora as cancelacións están a afectar a "clientes do Imserso, porque teñen medo porque ademais son un grupo de risco alto" e "sobre todo a xente que vai a Italia. Están a cargarse Italia cando tampouco hai motivo, está a cancelarse por cancelar, porque hoxe mesmo mandáronme fotos doutros grupos en Roma e están as prazas cheas de xente, con total normalidade. Hai unha psicose absoluta".
Abelleira tamén rexistrou cancelacións de clientes de empresa, algo que considera normal porque as feiras e congresos internacionais aprazáronse, "como a dun cliente que tiña feira a semana que vén en Bolonia e aprazouse para xuño". Pero o peor, témese, é que "vai haber unha freada enorme en canto a vendas, á xente vaille entrar o medo e non vai querer comprar porque non vai saber se no seu destino vai aparecer un caso de coronavirus. E o peor é que ao final terminará aparecendo en todas partes, como pasou coa gripe A ou coa gripe aviaria". No punto de mira está a Semana Santa: "Está case toda vendida e de momento non hai cancelacións, porque é moi pronto", explica Nadia Abelleira confiando en que todo se solucione e en que os medios de comunicación axuden a frear o pánico.
Un desexo que comparte José Álvarez, de Nautalia Viaxes, quen asegura que aínda non tivo cancelacións: "O que intentamos é transmitir tranquilidade aos nosos clientes porque o que hai é moito alarmismo. Ademais, nos destinos que se viron moi afectados, son as propias compañías as que suspenderon as saídas e han reembolsado o diñeiro, os viaxeiros non van ter problemas".
No entanto, é consciente de que "o medo é libre", algo que se percibe no incremento na demanda do "seguro de cancelación: por 50 euros, resérvanse o dereito a cancelar a viaxe ata 48 horas antes. Iso dálles moita tranquilidade".
Un seguro similar ao que comercializan en Quimaturs, segundo detalla José Quiroga: "Agora temos no mercado un seguro de cancelación que che permite anular a viaxe ata 72 horas. Ten unha franquía do 10% do prezo da viaxe, pero compensa porque podes cancelalo se che dá a gana".
Nesta axencia tiveron unha cancelación "o luns, dun cliente que nin se presentou ao voo, nunha viaxe a Roma. Nin sequera estaba xustificado nese momento, porque ese día non había casos declarados alí, pero decidiu non ir e perder a viaxe". Cre que "os que teñen saídas previstas esta semana van saír, por exemplo uns clientes que se van a Tailandia e Cambodia", pero recoñece que xa empezan "a notar que baixan as reservas, e haberá menos ata que a situación se aclare".
"Tamén estamos a empezar a vender", detalla Quiroga, "as viaxes de noivos para a tempada de vodas, e hai xente que está a cambiar de plans e en vez do sueste asiático está a cambiar a Sudamérica e norte de África, porque din que a máis de 25 graos o coronavirus ten máis dificultades para transmitirse".
O que non pode evitar é contaxiarse do temor polo propio medo ao coronavirus: "Hai máis alarma que o risco que supón en realidade, pero si temo o que pase coa tempada de Semana Santa. E é normal que se isto non se controla a xente se expoña: ¿Para que vou arriscar? Creo que se van a retardar moito as vendas de viaxes".
