Unha axencia de detectives privados investigou desde hai case un mes ao cerebro e á súa man dereita da banda de sextorsión que foi desarticulada o pasado venres na capital lucense, tras presuntamente estafar 60.000 euros aos pais dun lucense ao que chantaxeaban con "empapelar" a cidade con fotos súas "en pelotas".
Os detectives da axencia gravaron a reunión que mantiveron o pasado xoves, nunha cafetería do centro da cidade, o xefe do grupo e o seu lugartenente -ambos os porteiros dun céntrico pub de Lugo con antecedentes penais por delitos violentos- coa nai da vítima para que fixese unha nova entrega de 7.000 euros -esixíronlle outra de 13.000 para mediados de decembro-.
Eses 60.000 euros que pagou o matrimonio de avanzada idade, atemorizado porque cría que corría perigo a vida do seu único fillo, eran "os aforros de case toda a súa vida", segundo asegura o director do despacho que realizou a investigación privada, José López Riopedre.
Tras desembolsar a prazos ese forte suma de diñeiro, os pais acudiron a mediados do mes pasado a este despacho da capital lucense porque xa non as tiñan todas consigo. Non sabían que a orixe da extorsión ao seu fillo era de contido sexual. Este enviara por redes sociais fotos espido a un membro da banda, unha excamareira do mesmo pub, J.V.V., de 27 anos.
Os pais explicaron aos detectives que as primeiras entregas realizáronas tras as ameazas telefónicas que recibiron dunha persoa que se facía pasar por un tal Dimitri, que dicía ser dono dun bordel no que aseguraba que o seu fillo deixara unha elevada débeda.
A banda cambiou despois a súa estratexia. Intensificou a agrevisidade e xa o interlocutor era José, o prestamista, que dicía que a vítima contraera débedas en salas de xogo de Lugo e en coñecidas páxinas de póker en internet.
VÍTIMA PROPICIATORIA. López Riopedre considera que o extorsionado, ao que define como "moi traballador, familiar e que nunca lle deu un problema aos seus pais, cos que se leva moi ben", reúne "o perfil de vítima" deste tipo de delitos pola "súa vulnerabilidade", debido a que é "unha persoa cohibida, con poucas relacións sociais e moi dependente das redes sociais".
O primeiro que fixeron os detectives privados foi facer un seguimento á vítima. Viron como acudiu ao pub do centro de Lugo onde traballaban como porteiros o cerebro da banda, E.F.M. de 36 anos e nacionalidade arxentina, que ingresou na prisión de Bonxe, e a súa man dereita, J.S.F.S., de 28 e uruguaio, que deberá persoarse os días 1 e 15 de cada mes no xulgado.
Cando se atopa con eles, que dicían ser os seus amigos, o chantaxeado "móstrase submiso" e ambos "vacílano en público e búrlanse del", segundo detalla López Riopedre.
