A titular do xulgado de instrución número 1 de Lugo, Pilar de Lara, permanecerá á fronte do mesmo, a pesar da a sanción imposta polo pleno do Consello Xeral do Poder Xudicial de sete meses e un día que supón perda de destino, ata "polo menos" o mes de xaneiro.
Así o manifestou o avogado da xuíza, Agustín Azparren, quen confirmou que aínda non se lle notificou a sanción, que foi ratificada en pleno polo órgano de goberno dos xuíces o pasado 26 de setembro.
"A única noticia é a que tivemos pola prensa o día do pleno e aínda non se notificou a resolución. Normalmente faise un acordo no pleno e despois hai que redactalo e tarda uns días, pero non teño nin idea do que se pode tardar. A partir da notificación empeza a correr o prazo de dous meses para presentar recurso ante o Tribunal Supremo", explicou.
Pilar de Lara, asegurou o seu avogado, aínda disporía, desde que se lle comunique formalmente a sanción, de dous meses, "que é o prazo máximo", para preparar "o recurso" ante o Tribunal Supremo.
Azparren avanzou que "cando se anuncia a interposición do recurso tamén se vai a solicitar a suspensión da execución da sanción". "Iso adoita tardar sobre un mes para ver se se suspende a execución ou non", comentou.
"Se se fai executiva a suspensión, case polas datas nas que estamos estariamos a falar de primeiros de xaneiro" de 2020, apuntou o letrado en relación a cando empezaría a aplicarse a sanción.
"Houbo moitos escritos, as razóns fundamentais sobre desatención non encaixa dentro deste tipo disciplinario. Tamén exporemos outros motivos", apostilou.
A xuíza Pilar de Lara foi premiada esta fin de semana en Sevilla no marco do II Congreso sobre os Dereitos dos Animais, un premio concedido "polo seu papel pioneiro na defensa dos animais".
Dito premio foi denominado Excalibur en homenaxe ao can sacrificado en 2014 en Madrid como sospeitoso de estar infectado polo virus ébola do mesmo xeito que a súa dona, a sanitaria con orixes en Becerreá Teresa Romeu.
