Un avogado lucense, Pablo Lozano Pardiño, continúa exercendo como letrado a pesar de que actualmente se atopa inhabilitado e non está dado de alta en ningún colexio profesional. A actuación desta persoa preocupa desde hai tempo ao colectivo, ata o punto de que o Colexio de Avogados de Lugo comunicou por escrito a todos os xulgados da provincia que Pablo Lozano non está habilitado para realizar ningún tipo de trámite como letrado, xa que calquera actuación ou acordo serían nulos.
O colexio profesional abriulle expediente a este letrado tras recibir polo menos catro denuncias de particulares, aos que supostamente enganou. O órgano trasladou os casos á Fiscalía e finalmente tramitou a baixa de Lozano por non pagar as cotas obrigatorias.
Aínda así, o home —que tivo o seu despacho en varias localizacións distintas, como na Rúa da Raíña ou na Rúa Vilalba— continúa exercendo e en ocasións son os seus propios compañeiros quen o ven no xulgado con algún cliente e alertan aos funcionarios para que non lle permitan actuar.
Aínda así, Pablo Lozano continúa sen darse por avisado e este xoves intentou defenderse a si mesmo nun xuízo contra el que se ía a celebrar no Penal 1, pero tampouco llo permitiron por estar inhabilitado, polo que a vista se suspendeu. Segundo explicaron desde o Colexio de Avogados, como licenciado en Dereito, o acusado podería solicitar unha habilitación puntual para esa vista, pero nin tan sequera pediuna.
No xuízo fixado para este xoves, Lozano estaba acusado de deslealdade profesional, falsidade en documento privado, falsidade en documento público, e uso de documento falso, por enganar unha clienta e confeccionar el mesmo a sentenza dun caso de incapacidade que nunca tramitou.
Lozano afronta seis anos de cárcere por simular el mesmo unha sentenza dunha demanda de incapacidade que non chegou a tramitar
O fiscal alega que, en outubro de 2012, a denunciante contratou ao acusado para que lle reclamase unha declaración de incapacidade permanente fronte ao Instituto Nacional da Seguridade Social. O INSS denegou a solicitude e a afectada encargoulle a Lozano que emprendese accións legais por vía xudicial para recorrer a resolución denegatoria. O avogado aceptou o traballo e díxolle á muller e ao seu fillo que presentara a demanda ante os xulgados do Social de Lugo, pero non o fixo.
Aínda así, mentiu á familia durante máis de tres anos e finalmente dixo que declararan á muller en situación de invalidez permanente e que tiña dereito a unha pensión equivalente ao 55% da base reguladora. Ademais, contoulle que o INSS recorrera o fallo ante o TSXG, que desestimara o recurso.
Como a familia non recibía pensión, pediulle explicacións a Lozano, quen lles dixo que xa falara co INSS para que iniciasen inmediatamente o pago. Incluso lle pediu á clienta que comprobase a diario os movementos da súa conta, polo que a muller foi á sucursal bancaria durante 20 días seguidos, en novembro de 2016. Ademais, para apoiar a súa mentira, o avogado confeccionou un documento simulando ser unha fotocopia da suposta sentenza do TSXG.
Por este caso, o fiscal solicita para Pablo Lozano ano e medio de cárcere e multa de 12.000 euros. A acusación particular pide seis anos e medio de prisión e 21.600 euros de multa. Ademais, esixe 50.000 euros de indemnización para a afectada, á que Lozano aconsellou incluso que deixase de cotizar á Seguridade Social.
