viernes. 18.09.2020 |
El tiempo
viernes. 18.09.2020
El tiempo

Avisan en Lugo dun intento de estafa telefónica de persoas que din traballar para Microsoft

Unha muller traballa diante do computador. PIXABAY (Kaboompics)
Unha muller traballa diante do computador. PIXABAY (Kaboompics)
Utilizan un suposto problema técnico que en realidade non existe para conseguir contrasinais e información persoal

A Policía Nacional de Lugo alerta dun intento de estafa telefónica de individuos que se fan pasar por empregados de Microsoft e outras compañías tecnolóxicas para obter datos que poidan chegar a servirlles para estafar o usuario do teléfono ao que chaman. 

Segundo informa a comisaría de Lugo, a Policía tivo coñecemento de que nos últimos días "están a recibirse chamadas a teléfonos fixos da cidade, facéndose pasar por empregados do soporte técnico dunha compañía tecnolóxica, Microsoft principalmente". 

Logo de preguntar se é usuario dun computador, "alegan a existencia dun problema técnico irreal e, tras o emprego de diversas técnicas de persuasión, terminan conseguindo tanto contrasinais como determinada información persoal". 

A Policía sinala que en determinados casos logran "facerse co control remoto do computador para, posteriormente, extorsionar o seu propietario, esixíndolle o abono dunha determinada cantidade de diñeiro para poder liberar o control do seu dispositivo". 

Do mesmo xeito, "noutras ocasións conseguen facerse cos datos bancarios do usuario, baleirándolle a conta bancaria en poucos minutos", subliña a Policía. 

Por iso, a Policía Nacional recorda que non se deben facilitar datos de carácter persoal a quen non se coñeza", e "moito menos datos bancarios". Tampouco deben abrirse arquivos adxuntos sospeitosos nin facer clic en vínculos inusuais procedentes de correos electrónicos e mensaxes descoñecidas.

Avisan en Lugo dun intento de estafa telefónica de persoas que din...
comentarios