Unha nova avaría na rede de auga obrigou este domingo a cortar o abastecemento a veciños de Fingoi, parte dos cales non poderán recuperar o servizo ata este luns, segundo avanzou o Concello.
A rotura provocou, ademais, o enfado veciñal, xa que os residentes empezaron a dar aviso ao Concello pouco logo das nove da mañá, pero ata as tres da tarde a auga seguiu correndo e chegou a alagar os patios dalgunhas vivendas. O problema afectou á rúa Pai Sarmiento e a algunhas vivendas dunha vía contigua.
O Concello acabou ao final por pechar dúas chaves de paso da rede de subministración ata lograr dar co punto concreto no que se produciu a rotura.
A media tarde seguíase traballando e a idea era reabrir polo menos unha das chaves de paso, para que polo menos parte dos veciños puidesen recuperar a subministración.
O concelleiro Manuel Núñez desprazouse ata o lugar e o Concello xa adiantou que ata esta mañá non se poderían iniciar os traballos de reparación para devolver a completa normalidade á subministración de auga desa zona.
