Vecinos de Fingoi pasaron case dous días sen auga despois de que se producise a rotura dunha tubaxe da traída na Rúa Erín. Co fin de evitar inundacións na zona, o operario de garda decidiu pechar o paso o domingo ás doce da mañá e, finalmente, non puido restablecerse o servizo ata as oito menos cuarto da tarde do luns.
O concelleiro de medio ambiente, Álvaro Santos, sostivo que non se puido iniciar a reparación ata o luns pola mañá. "A brigada municipal de augas conta con equipos especiais para poder manipular axeitadamente ou fibrocemento, un equipamento dos que non dispoñen tódalas empresas e que resulta imprescindible para minimizar riscos tanto físicos como ambientais. Ese foi o motivo principal polo que se adiou ata hoxe a devandita reparación, a pesar das molestias que puido ocasionar entre os residentes afectados estar sen auga corrente durante un día", afirmou.
Tamén avanzou que o Concello se expón a posibilidade de facer un contrato específico para atender urxencias no servizo de augas. Recordou que, noutras ocasións, recorreuse a externalizacións por vía de urxencia pero agora estúdase a posibilidade de contratar unha firma para as avarías que se dan fóra do horario da brigada municipal.
A fuga na Rúa Erín volveu deixar en evidencia a falta de persoal do servizo de augas que permanece de garda. Con só un técnico, as avarías non poden repararse en fin de semana.
