O Concello de Lugo licitará este mércores o proxecto para construír as caldas na beira do río Miño, cun custo inicial de 924.000 euros e un prazo de execución de 12 meses.
Serán seis piscinas, catro de auga quente —mediante aerotermia—, e dúas de fría. Unha delas será accesible para persoas con mobilidade reducida. Cada unha terá un aforamento de 50 persoas. As caldas non son termais, non teñen propiedades medicinais.
Situaranse nunha parcela duns 400 metros cadrados á beira do río Miño, entre a pasarela peonil da fábrica da luz e o Pazo de Feiras e Congresos.
As seis pozas de uso público serán gratuítas e estarán abertas todos os días do ano. Si terá horario de atención o edificio que se construirá para albergar os vestiarios.
Este proxecto, que se enmarca na estratexia Dusi Muramiñae, pretende contribuír a dinamizar social e economicamente a zona, segundo apuntou a alcaldesa Lara Méndez, que presentou este luns as obras xunto ao edil Miguel Fernández
