Axentes da Policía Local e efectivos do 061 auxiliaron unha menor de 13 anos atopada cunha "forte intoxicación etílica" tras consumir "gran cantidade de alcol" na cidade de Lugo.
Atendendo á información da Policía Local, sobre as 19.35 horas do sábado unha patrulla da Unidade Territorial de Policía de Barrio foi enviada á carballeira da Avenida de Fingoi pola presenza dunha moza cunha "forte intoxicación etílica".
Axentes acudiron ao lugar en compañía dunha ambulancia do 061 e atoparon a moza inconsciente, tombada nun banco dunha das mesas, acompañada doutros tres mozos, os cales manifestaron que consumira "gran cantidade de alcol".
Os axentes acompañaron á ambulancia e localizaron aos pais da menor, aos que informaron os feitos para que se desprazasen ao Hospital Universitario Lucus Augusti (Hula), centro ao que foi trasladada a moza.
