Unha patrulla da Policía Local de Lugo auxiliou o pasado xoves a un octoxenario que caeuse no interior do seu domicilio e non era capaz de levantarse.
A intervención policial tivo lugar ao redor das catro da tarde, cando unha dotación da Unidade Territorial de Policía de Barrio recibiu un aviso desde a Sala do 092 para que se trasladase a unha vivenda da Praza Viana do Castelo, xa que supostamente unha persoa de avanzada idade sufrira unha caída no seu interior e non era capaz de levantarse do chan polos seus propios medios.
Os axentes accederon ao interior do domicilio indicado e comprobaron que había un home —de 88 anos de idade— tombado no chan do salón, polo que o axudaron inmediatamente a levantarse e sentárono nun das cadeiras de brazos da vivenda. O afectado asegurou que se atopaba en perfecto estado de saúde e rexeitou recibir calquera tipo de asistencia médica ou sanitaria, polo que os policías deron por finalizada a súa intervención.
A Policía Local realiza cada vez máis servizos humanitarios destas características, reclamados fundamentalmente por persoas de avanzada idade que viven soas e que optan por chamar aos axentes e pedir axuda cada vez que atravesan por unha situación complicada. As patrullas acoden a todas as chamadas cidadás deste tipo que se reciben na Sala do 092.
