A venda das probas de autodiagnóstico en Lugo é todo un éxito e a tendencia non diminúe. O incremento dos contagios provocou que os lucenses se lancen ás farmacias en busca dos prezados tests, algo que no futuro podería comprometer a súa dispoñibilidade.
A semana do 19 ao 25 de xullo en Galicia vendéronse 43.627probas de autodiagnóstico. Boticas como a de Fingoi, en Lugo, víronse afectadas por esta avalancha de pedidos e chegaron a esgotar as súas existencias.
O esperado era que, do mesmo xeito que coas máscaras, a demanda destas probas diminuíse co paso dos días, algo que finalmente non ocorreu.
O modelo máis buscado polos lucenses segue sendo o individual. Existen tamén paquetes de cinco autotests para os máis desconfiados pero estes non teñen tanto éxito como os primeiros.
As farmacias máis precavidas non están a sufrir este desgaste: "Aquí non temos problema de stock porque fixemos un pedido amplo, aínda que o número de vendas sexa alto sería raro vender 70 test nun día", afirma relaxada Belén Ferreiro, empregada da farmacia Lugo Norte.
A dificultade para acceder aos tests provocou desabastecementos puntuais que finalmente se solucionaron en poucos días
As probas de autodiagnóstico chegan "a contagotas". O motivo desta falta de abastecemento podería ser, entre outros, que a maioría de fábricas operan en China; unha cuestión que compromete a rapidez da súa chegada a España.
A dificultade para acceder aos tests provocou desabastecementos puntuais que finalmente se solucionaron en poucos días. é o caso da farmacia Ama, en Viveiro, un dos concellos lucenses máis azoutados pola quinta onda: "Aínda que agora non temos ese problema houbo dous días nos que non tiñamos existencias de test de autodiagnóstico ", comenta a boticaria Gabriela Roda.
As cifras indican que, polo momento, a maioría de boticas lucenses non teñen problemas agudos á hora de abastecer aos cidadáns. Pola contra, outras comunidades non teñen a mesma sorte e; de seguir o ritmo da semana pasada, a súa subministración de probas de autodiagnóstico si correría perigo. O peor escenario albíscase en Cataluña, onde a semana pasada vendéronse o 27% das probas fornecidas en España (386.155 tests).
