O sector lucense do automóbil une forzas e saca músculo para afrontar en marzo dúas citas clave para as vendas. Tras un inicio de ano discreto, os concesionarios confían nos efectos que terá sobre a demanda local a celebración do Salón do Automóbil de Lugo, que arrincará este venres no Pazo de Feiras e Congresos coa mostra do vehículo novo e que terá continuidade a próxima fin de semana coa de usados.
A unión do sector queda patente porque en ambas as feiras estarán a totalidade dos concesionarios da capital, que suman no seu conxunto un total de 40 marcas.
Entre todas elas confían en vender durante as dúas fins de semana uns 300 vehículos. Para conseguilo, o sector cre que resultarán claves os importantes descontos que se aplicarán nalgunhas unidades expostas.
Pero independentemente dos obxectivos comerciais, todo o sector coincide en sinalar que o evento será unha oportunidade única para aclarar aos consumidores as dúbidas e incertezas que xeraron declaracións como as que, por exemplo, realizou o pasado verán a ministra de Transición Ecolóxica, Teresa Ribera, pondo data ao fin dos coches con motores diésel e que despois rectificaron desde o propio Goberno.
Esta foi unha das preocupacións que trasladaron responsables de concesionarios lucenses na reunión que mantiveron este martes na sede deste diario e na que analizaron algúns dos retos aos que se enfronta o mercado de cara aos próximos meses.
O sector lucense considera que a decisión de compra dos usuarios tamén se está vendo influenciada pola confusión existente á hora de elixir o tipo de motorización que mellor se adapta ás súas necesidades. Defenden, neste sentido, que na actualidade calquera alternativa enerxética dispoñible nun vehículo novo -gasolina, diésel, gas, híbrida ou eléctrica- resulta o suficientemente eficiente como para poder circular por calquera cidade, sen ter que preocuparse por posibles restricións ao tráfico por mor das emisións.
O sector tamén avoga por medidas encamiñadas a incentivar a renovación do parque español -que cunha media de 12,5 anos é dos máis envellecidos de Europa- non só polos beneficios ambientais que reporta senón tamén pola mellora que supón para a seguridade viaria.
